Cristina, ki gen 37 an, se manman de timoun, Crista ki gen 14 an ak Diego ki gen 11 an. Cristina soti El Salvador epi li ap viv Ozetazini depi 1993. Li gen TPS depi 2001, lè li te gen 20 an . Kounye a, Cristina ap travay kòm direktè yon pwogram aprè lekòl nan lekòl katolik pitit li yo ale a. Li menm ak mari l – mennaj li nan lekòl segondè – ap viv nan yon kay yo posede nan konte Contra Costa.

Sa byen lwen anfans Cristina. Li te vwayaje Ozetazini san okenn manm fanmi lè li te gen sèlman 12 an. Manman l te chape anba vyolans domestik epi li te kouri anvan li, epi Cristina te swiv li—poukont li. Cristina ak pitit li yo enkyete sou efè fen TPS la sou fanmi yo—epi yo angaje yo pou defann TPS pou tèt yo ak lòt fanmi yo. Cristina te soufri yon chòk lè li te yon timoun epi li vle asire ke pitit li yo pa janm fè menm bagay la.

Crista, pi gran pitit fi Cristina a, nan wityèm ane. Li se yon elèv motive epi li reve pou l vin yon avoka imigrasyon. Crista enkyete sou sa k pral rive si manman l pèdi estati TPS li. Li depann de manman l epi li pa janm viv oswa vwayaje nan El Salvador. Ni Cristina ni Crista se demandè nan pwosè a.

Elsy ak mari l Juan toulede gen TPS ki soti El Salvador epi ki manm National TPS Alliance. Yo gen twa timoun—Maria, ki gen TPS li menm; epi Juan Jr. ak Joanna, ki toulede fèt Ozetazini epi ki sitwayen ameriken. Elsy, mari l, ak pi gran pitit fi yo ap viv nan Washington, DC depi 2000 epi yo gen TPS depi 2001.

Paran Elsy yo ak pifò nan frè ak sè li yo te kouri kite El Salvador pandan lagè sivil brital peyi a nan ane 1980 yo, e kounye a yo tout se swa sitwayen ameriken oswa rezidan pèmanan legal Ozetazini. Men, Elsy te twò jèn lè sa a pou l te vwayaje san danje epi li te rete dèyè. Li te vin jwenn yo Ozetazini an 2000—e kounye a li pa gen fanmi ki rete nan El Salvador. Elsy ap travay kòm yon travayè domestik ak yon moun k ap pran swen timoun depi 2004.

Maria te gen sèlman yon ane lè li te demenaje Ozetazini, epi li te gen anviwon dezan lè li te gen TPS. Maria, ki gen 19 an kounye a, te dekouvri li te gen TPS sèlman lè lè a te rive pou l aplike pou inivèsite epi sitiyasyon imigrasyon li te fè l pa kalifye pou bous detid. Kounye a, li nan dezyèm ane li nan inivèsite nan Maryland kote l ap etidye matematik epi rèv li se anseye elèv lekòl primè matematik. Li menm ak manman l te retounen El Salvador yon sèl fwa epi pou yon ti tan.

Elsy, Maria, ak Juan Jr. se demandè nan pwosè a.

Sherika, 27 an, te fèt nan Port de Paix, Ayiti, epi li te imigre Ozetazini avèk paran li ak de frè li lè li te gen uit an. Li gen TPS depi 2010, menm jan ak paran li ak de frè li yo. Sherika te dekouvri ke li te (lè sa a) san papye sèlman lè li te gradye nan lekòl segondè an 2009 epi li pa t kapab aplike pou èd finansye pou l ale nan inivèsite akòz sitiyasyon imigrasyon li. Kòm li pa t gen mwayen pou peye inivèsite, Sherika te resevwa fòmasyon avèk siksè pou l vin yon asistan enfimyè sètifye (CNA) ak yon kowòdonatè inite sante (HUC).

Touswit apre Sherika te fin gradye nan lekòl segondè, yo te deziyen Ayiti pou TPS. Depi lè sa a, Sherika te genyen swa TPS oswa DACA. Li te travay kòm asistan enfimyè ak kowòdonatris inite sante nan yon lopital toupre kote li menm ak fanmi li rete nan sid Florid. Sherika marye ak yon sitwayen ameriken epi ansanm yo gen twa pitit fi ki poko gen sizan. Rilya se pi gran pitit fi Sherika a ki gen senk an. Li te fèt nan Miami e kounye a li nan jadendanfan.

Estati TPS Sherika a chanje lavi li paske li ba li opòtinite pou l travay, achte yon machin, lwe yon kay, epi elve yon fanmi. Li pè ke tout bagay sa yo ka pèdi lè yo fini ak TPS la. Timoun li yo pa janm menm al an Ayiti, epi Sherika pa retounen depi li te gen uit an. Li angaje l pou l goumen pou l defann TPS pou tèt li ak fanmi li, epi pou tout lòt fanmi ki afekte yo.

Ni li menm ni pitit fi li Rilya se demandè nan pwosè a.

Orlando te vin Ozetazini soti El Salvador, a laj de 18 an, an 1984. Orlando te travay pandan plizyè ane nan antretyen bilding, kat dènye ane yo ak menm konpayi an. Jodi a, li gen 51 an, epi li gen 34 an depi l ap viv nan Los Angeles. Orlando ak madanm li, toulede gen TPS depi 2001, gen de timoun ki sitwayen ameriken ki gen douz ak katòz an.

Sa gen anviwon kenz ane, Orlando ak madanm li te achte kay kote y ap viv kounye a.

Pi gran pitit gason yo a, Benjamin, gen 14 an. Benjamin te fèt epi li te grandi nan Los Angeles e kounye a li nan 9yèm ane nan lekòl segondè. Li gen yon ti sè, Lizbeth ki gen 12 an, epi toulede depann sou paran yo pou sipò emosyonèl, sikolojik, edikasyonèl, espirityèl ak materyèl. Timoun yo konnen lavi yo t ap boulvèse si paran yo te pèdi estati TPS yo a.

Orlando gen prèske de fwa plis tan li te viv Ozetazini pase nan El Salvador. Li pase tout lavi li Ozetazini. Li te kite El Salvador nan mitan konfli ame vyolan peyi a epi li pa tounen depi lè sa a. Li pè li pa ta menm rekonèt peyi a kounye a. Ni youn ni lòt nan de pitit li yo pa janm ale El Salvador.

Orlando se yon manm nan National TPS Alliance, epi ni li menm ni pitit gason l lan, Benjamin, se demandè nan pwosè a.

Mazin gen 19 an e li fèt nan Soudan. Malgre li se Soudanè de nesans, paran li te demenaje al Katar lè li te gen sèlman yon ane. Lè li te gen 14 an, manman l te pran li menm ak frè ak sè l yo epi yo te demenaje Ozetazini. Mazin, manman l ak frè ak sè l yo tout gen TPS.

Mazin te rive Westbrook, Maine, alè pou l te kòmanse lekòl segondè, epi finalman li te gradye avèk onè. Jodi a, Mazin se yon etidyan dezyèm ane k ap etidye Biyoloji Imèn nan yon kolèj nan Maine, epi li te resevwa prestijye Prim Prezidan an ki baze sou Merit. Li gen plan pou l etidye pou l vin yon pedyat.

Mazin pa kwè ke li te ka retounen Soudan san danje, li pa gen dwa retounen Katar. Li te briye nan etid li yo Ozetazini, pandan l ap jwenn lavi l ak kominote l isit la.

Hiwaida se yon moun ki gen TPS ki soti Soudan epi li se yon edikatè sante, byolojis ak antreprenè. An 1997 li te vin Ozetazini avèk yon viza vizitè, men pandan sejou li a, sitiyasyon sekirite a te deteryore anpil nan Soudan. Kòm rezilta, gouvènman ameriken an te deziyen Soudan pou TPS epi Hiwaida te rete paske li pa t kapab retounen san danje.

Kounye a, li gen ventan depi l ap viv Ozetazini ak fanmi matant li. Pandan 16 ane nan ane sa yo, Hiwaida te travay kòm yon Edikatè Sante nan Depatman Sante Piblik Massachusetts. Toujou yon antreprenè, an 2015, li te louvri pwòp restoran li. Malgre siksè restoran li an, apre yo te fin mete fen nan TPS, li te pran desizyon difisil pou vann biznis la a yon pri ki wo. Sa te patikilyèman difisil akòz gwo dèt ki te nesesè pou louvri biznis la.

Hiwaida gen yon lisans nan byochimik depi anvan li te rive Ozetazini, epi yon metriz nan byoenformatik nan Inivèsite Brandeis. Li deside pote plent paske li konnen gen anpil lòt moun, tankou li, ki gen lavi ki pral boulvèse pa desizyon gouvènman san pitye sa yo.

Wilna, 43 an, manman de timoun, te vin Ozetazini soti Ayiti an 2000 apre li te fin sibi menas vyolans nan vil kote l te fèt la, Thomasique, Ayiti. Depi li rive, li te viv epi bati lavi li nan Orlando, Florid. Li te resevwa TPS an 2010.

Pitit fi Wilna a, Hnaida, ki gen 14 an, ak pitit gason l lan, John Poussin, ki gen 10 an, toulede se sitwayen ameriken. Ansanm, Wilna ak mari l, ki gen TPS tou, te achte yon kay pou fanmi yo. Depi 2014, Wilna te travay kòm yon òganizatè travayè pou sendika UNITE-HERE a, epi li te travay nan Disney World anvan. Li se yon manm aktif nan legliz li epi li te yon defansè solid pou TPS Alliance. Li dedye nèt ale a fanmi li ak ede lòt moun, epi li enkyete sou sa fen TPS la vle di pou fanmi li.

Hnaida te aprann nan egzanp manman l. Li se yon elèv ki sou tablo onè premye ane lekòl segondè epi li vle rantre nan Konsèy Elèv ane pwochèn. Li chante tou nan koral legliz li a epi li gen plan pou l vin yon jinekològ/obstetrisyen. Malgre jèn laj li, Hnaidda pataje enkyetid manman l konsènan fen TPS la, ak sa sa ka vle di lè l separe ak manman l oswa sèl kay li te konnen an.

Tou de Wilna ak Hnaida se demandè nan pwosè a.